Lennon: Hefði betur neglt boltann í mitt markið

Steven Lennon, framherji Fram, var vonsvikinn í leikslok. Flott frammistaða skilaði gestunum engum stigum og útlitið er afar svart.

„Það eru vonbrigði að fara héðan tómhentir. Í fyrri hálfleik spiluðum við vel, ég átti auðvitað að skora úr vítinu og þá hefðum við líklega klárað leikinn. KR á að vera sterkt félag en við spiluðum betur en þeir í fyrri hálfeik. Við vorum óheppnir að skora ekki því við höfðum yfirburði á vellinum, sagði Lennon.

„En þetta er saga tímabilsins hingað til. Við höfum ekki skorað mörk þegar við þurfum á þeim að halda. Kjánaleg mörk hjá þeim, hendi í vítateignum og svona," sagði Lennon en óhætt er að segja að hlutirnir falli ekki með bláklædda liðinu þessa dagana.

Lennon var sprækur í framlínu gestanna og krækti í vítaspyrnu í fyrri hálfleik. Hann steig sjálfur á punktinn en Hannes Þór, markvörður KR, varði spyrnu Skotans næsta auðveldlega.

„Já, þegar við fengum víti vildi ég taka það. Vonbrigði hversu illa ég hitti boltann. Ég hefði betur neglt boltann í mitt markið eða eitthvað. Svona gerist en ég er mjög vonsvikinn með úrslitin."

Lennon, sem hafði skorað þrjú mörk í tveimur leikjum fyrir leikinn í kvöld, hefur ekki áhyggjur á að markakvóti hans sé búinn.

„Nei nei, ég er viss um að ég skori aftur. Ég fékk færi í kvöld, bjó til nokkur en við verðum að gleyma þessum leik og einbeita okkur að þeim næsta. Vonandi getum við skorað fleiri mörk og nælt í fleiri stig."