Umfjöllun: Blikar gerðu út um Evrópudraum Stjörnumanna

Breiðablik gerði útum Evrópudraum Stjörnunnar þegar Guðmundur Pétursson skoraði fjórða mark heimamanna í 4-3 sigri Breiðabliks. Breiðablik komst í 2-0 í leiknum, en Stjarnan gafst aldrei upp og minnkuðu muninn. Blikar komust því næst í 3-1, en þá náðu gestirnir að jafna metinn í 3-3. Þarna áttu gestirnir möguleika á því að komast í Evrópukeppnina, en Blikar náðu að innbyrða sigur 4-3 í uppbótartíma í ótrúlegum leik sem hafði allt upp á að bjóða.

Heimamenn voru flottir í fyrri hálfleik og minnti spilamennska þeirra örlítið á frammistöðu liðsins á síðasta ári. Eftir tíu mínútna leik setti Arnar Már Björgvinsson, leikmaður Blika, boltann í stöngina eftir mikinn darraðardans inn í vítateig Stjörnunnar.

Eftir um hálftíma leik var Arnar Már aftur á ferðinni þegar hann skaut boltanum rétt framhjá. Stjörnumenn voru einnig skeinuhættir en markamaskínan Garðar Jóhannsson skallaði boltann í þverslánna á 37. mínútu.

Fyrsta mark leiksins kom aftur á móti tveim mínútum síðar þegar Arnar Már Björgvinsson lagði boltann vel í autt markið eftir fína fyrirgjöf frá Kristni Steindórssyni.

Tveim mínútum eftir markið kom annað mark frá Blikum en Andri Rafn Yeoman, en Andri skoraði markið eftir að hafa fengið magnaða stungusendingu frá Kristni Steindórssyni. Kristinn kom því að báðum mörkum fyrri hálfleiksins. Staðan var 2-0 í hálfleik eftir skemmtilegan fyrri hálfleik.

Seinni hálfleikurinn var hreint út sagt ótrúlegur, en gestirnir voru ekki lengi að minnka muninn en Baldvin Sturluson skoraði ágætt mark með skalla í byrjun síðari hálfleiks.

Arnar Már Björgvinsson var aftur mættur tíu mínútum síðar þegar hann kom Blikum yfir 3-1 og staðan orðin vænleg fyrir heimamenn.

Stjörnumenn voru heldur betur ekki á því og korteri fyrir leikslok náði Halldór Orri Björnsson að minnka muninn í 3-2 með marki beint úr aukaspyrnu. Aðeins tveimur mínútum síðar náði Stjarnan að jafna metinn þegar varamaðurinn Aron Grétar Jafetsson skoraði fínt mark.

Stuttu síðar var tilkynnt í hátalarakerfið að Grindvíkingar væru komnir yfir út í Vestmannaeyjum og því nægði eitt mark frá Stjörnunni til að koma liðinu í Evrópukeppnina.

Það gerist aftur á móti ekki en Guðmundur Pétursson, sem hafði rétt áður komið inná sem varamaður,  slapp einn í gegn og lagði boltann snyrtilega framhjá Ingvari Jónssyni í marki Stjörnunnar og Evrópudraumur Garðbæinga úti.

Magnaður leikur sem lauk með 4-3 sigri Breiðabliks og líklega einn besti knattspyrnuleikur sumarsins.

Breiðablik  4 – 3 Stjarnan

1-0 Arnar Már Björgvinsson  (39.)

2-0 Andri Rafn Yeoman (42.)

2-1 Baldvin Sturluson (54.)

3-1 Arnar Már Björgvinsson (66.)

3-2 Halldór Orri Björnsson (76.)

3-3 Aron Grétar Jafetsson (78.)

4-3 Guðmundur Pétursson (92.)

Skot (á mark): 12 – 13 (10-10)

Varin skot: Ingvar  6 – 6 Ingvar

Horn: 5 – 4

Aukaspyrnur fengnar: 9–10

Rangstöður: 7-5

Dómari: Magnús Þórisson  7