Umfjöllun: Rúnar tryggði Val sigur í uppbótartíma

Valur sigraði Þór 2-1 í eina leik dagsins sem ekki var frestað í Pepsí deildinni í kvöld. Valur náði þar með FH að stigum í baráttunni um Evrópusæti en Þór er sem fyrr einum sigri frá því að gulltryggja sæti sitt í deildinni að ári.

Mikill vindur og rigning setti sterkan svip á leikinn sem komst aldrei á flug. Þór lék undan vindinum í fyrri hálfleik og náðu ekki nýta sér hann því liðinu gekk mjög illa að halda boltanum innan liðsins við erfiðar aðstæður. Valsmenn voru í raun betri á móti vindinum og komust yfir rétt fyrir lok fyrri hálfleiks.

Þetta snérist við í seinni hálfleik. Valsmönnum líkt og Þórsurum tókst ekki að nýta sér vindinn og Þór jafnaði metin eftir góða skyndisókn þegar rétt um 20 mínútur voru eftir af leiknum. Færin létu á sér standa og benti ekki margt til þess að sigurmark kæmi í leikinn fyrr en fyrriliði Þórs, Þorsteinn Ingason, tók varamanninn Jón Vilhelm Ákason niður í teig Þórs og úr vítinu skoraði Rúnar Már af miklu öryggi.

Það var því Valur sem tók stigin þrjú og setti aukna pressu á FH í baráttunni um Evrópusæti en FH á leik til góða gegn Grindavík á morgun. Þór er í 9. sæti deildarinnar og þarf einn sigur til að gulltryggja sæti sitt í deildinni nema Fram misstígi sig gegn Keflavík á morgun.

Valur - Þór 2-1

Dómari: Gunnar Jarl Jónsson (7)

Skot (á mark): 9-2 (5-1)

Varið: Haraldur 0 – Srdjan 3

Hornspyrnur: 6-3

Aukaspyrnur fengnar: 11-5

Rangstöður: 0-1