Segir fjárfestingu lífeyrissjóða renna í vasa Ross Beaty

Fjárfesting lífeyrissjóðanna í HS Orku fór að stórum hluta til forstjóra móðurfélags HS Orku. Þetta fullyrðir Ásmundur Friðriksson, bæjarstjóri í Garði, og vitnar í Ross Beaty sjálfan.

Samlagshlutafélagið Jarðvarmi slhf. sem er í eigu fjórtán lífeyrissjóða gekk hinn 1. júní síðastliðinn frá kaupum á 25 prósent hlutafjár í HS Orku af dótturfélagi Magma Energy upp á 8,1 milljarð króna. Magma Energy heitir í dag Alterra Power.

Ásmundur Friðriksson, bæjarstjóri í Garði, fullyrðir að stór hluti kaupverðsins, eða tæpir þrír milljarðar króna, hafi farið í að greiða skuld við Ross Beaty, forstjóra Alterra Power, eiganda HS Orku.

Ásmundur segir að Beaty hafi sagt þetta sjálfur á fundi í Garði í vor. „Hann sat þar fyrir svörum okkar bæjarstjóra á Suðurnesjum, þingmanna og annarra og það kom fram í hans máli, þegar spurt var um væntanleg kaup lífeyrissjóðanna í HS Orku að það fé yrði notað til að endurgreiða honum það lán sem hann lánaði Magma til að kaupa hlutinn í HS Orku á sínum tíma," segir Ásmundur.

Ásmundur segir að hann hafi ekki trúað þessu fyrst. Honum hafi fundist einkennilegt að lífeyrissjóðirnir hafi samþykkt að stór hluti fjárfestingar þeirra færu ekki í að byggja upp atvinnulífið á Suðurnesjum.

„Mér finnst það afar öfugsnúið að fjárfestingar lífeyrissjóðanna í atvinnulífinu á Íslandi eigi að fara í að greiða skuldir við eigendur félaga í erlendum ríkjum og jafnvel til annarra verkefna þar sem ég geri alveg eins ráð fyrir að þessir peningar verði nýttir til."

Ásgeir Margeirsson, forstjóri Alterra Power á Íslandi, segir það rétt að Ross Beaty hafi veitt félaginu skammtímalán upp á 25 milljónir dollara.

Peningarnir sem komu frá lífeyrissjóðunum, þeir eru að fara í að greiða forstjóranum þetta lán? „Það get ég nú ekki sagt alveg ákveðið, en eflaust hefur það einhver áhrif. Ross Beaty lánaði félaginu á síðasta ári fjármagn með skammtímaláni sem var notað sem rekstrarfé. En Alterra Energy er með víðtæka starfsemi og er með orkuver í rekstri og þar með orkusölu bæði í Bandaríkjunum og Kanada. Það er því mikið fjárstreymi í félaginu. Þetta var endurgreiðsla á láni sem var komið á tíma en ég get ekki svarað því nákvæmlega hvaða krónur eða dollarar fóru í það," segir Ásgeir. thorbjorn@stod2.is