Kjartan Henry markahæstur KR-inga í Evrópukeppnum

Kjartan Henry Finnbogason skoraði fyrsta mark KR-inga í 3-1 sigrinum á ÍF í Evrópudeildinni í gær. Kjartan Henry hefur þar með skorað fimm mörk samtals í Evrópukeppnum fyrir KR. Markið gerði hann að markahæsta KR-ingi í Evrópukeppnum frá upphafi.

Fjallað er um met Kjartans Henry á heimasíðu KR, www.kr.is. Fyrir leikinn í gær deildi Kjartan Henry metinu með fjórum fyrrverandi leikmönnum KR þeim Einari Þór Daníelssyni, Guðmundi Benediktssyni, Mihajlo Bibercic og Ríkharði Daðasyni.

Ef litið er á öll íslensk félagslið er Kjartan kominn í hóp góðra manna sem hafa skorað fimm mörk í Evrópukeppnum og deila 2. sætinu yfir markahæstu Íslendingana. Leikmennirnir eru Hermann Gunnarsson (Valur), Sigurvin Ólafsson (ÍBV, KR, FH), Hörður Sveinsson (Keflavík), Mihajlo Bibercic (ÍA, KR) og Ríkharður Daðason (Fram og KR).

Markahæstur allra er Eyjamaðurinn Tryggvi Guðmundsson sem hefur skorað 10 mörk í Evrópukeppnum með ÍBV og FH.