Sameining leikskóla = faglegur ávinningur?

Leikskólastjórar og kennarar hafa gagnrýnt harðlega hugmyndir um sameiningu leikskóla og sameiningu grunn- og leikskóla. Bent hefur verið á að niðurskurður bitni á faglegu starfi og leiði til aukins álags á starfsfólk. Hvergi hafa fagaðilar fjallað um að faglegur ávinningur hafi hlotist af niðurskurði fyrri ára svo okkur sé kunnugt um. Á hvaða gögnum byggist þessi fullyrðing borgarfulltrúa sem mæla fyrir hugmyndinni?

Formaður menntaráðs hefur haldið því fram að samkvæmt rannsóknum telji foreldrar að sameining skóla hafi ekki áhrif á þjónustu við börn þeirra.

Við hvaða rannsóknir er hér átt við? Ein námsritgerð hefur verið unnin hérlendis um sameiningu grunnskóla þar sem viðhorf níu foreldra voru könnuð (Óskar J. Sandholt, 2006). Alhæfingar­gildi slíkrar rannsóknar er afar takmarkað. Eru til aðrar rannsóknir sem fulltrúar borgarinnar alhæfa út frá og þá sérstaklega rannsóknir sem kanna viðhorf foreldra í kjölfar sameiningu leikskóla? Fyrir hönd stjórnar foreldrafélaga leikskóla í Reykjavík er óskað eftir útlistun á slíkum rannsóknum sem fyrst.

Í desember sl. var fjárhagsáætlun Reykjavíkurborgar samþykkt í borgarstjórn. Meðal annars er gert ráð fyrir að ná fram sparnaði með því að sameina stofnanir. Á þeim tíma hafði foreldrum ekki verið boðið til fundar af hálfu borgarinnar til samráðs um þessa ákvörðun. Ennfremur höfðu leikskóla­stjórar ekki verið beðnir um að leggja fram hugmyndir varðandi sameiningu skóla fyrir þann tíma. Þeir komu því ekkert að þessari ákvarðanatöku. Hins vegar, eftir að þessi ákvörðun var tekin, var boðað til hverfafunda með foreldrum og viðtöl boðuð við leikskólastjóra. Það er okkur að öllu leyti óljóst hvernig samráð á að eiga sér stað eftir að ákvörðun hefur verið tekin. Í síðustu viku voru hugmyndir um sameiningu skóla loks sendar til leikskólastjóra frá starfsnefnd um málefnið, en þeim upplýsingum hefur fram að þessu verið haldið frá foreldrum af hálfu borgarinnar.

Það var ekki fyrr en árið 2008 að lagaleg heimild var veitt sveitar­félögum til að reka saman leik-, grunn og/eða tónlistarskóla undir stjórn eins skólastjóra. Heimildin var veitt „til að koma til móts við óskir sveitarfélaga, sér í lagi fámennra sveitarfélaga, sem sum hver höfðu átt í erfiðleikum með að fá fagmenntaða starfsmenn og stjórnendur til starfa eða sáu hagræðingarmöguleika felast í því að hafa einn stjórnanda yfir skólum sveitarfélagsins".

Við sameiningu grunn- og leikskóla í Reykjavík verður stjórnendum, þ.e. leikskólastjórum og aðstoðar­leikskólastjórum, sagt upp og stöður þeirra auglýstar. Hver verður hinn faglegi ávinningur af því að segja upp leikskóla­stjórum með áratuga reynslu? Hvað ef enginn þeirra sækir um á ný? Er hér ekki teflt á tæpasta vað af hálfu borgaryfirvalda? Sumir mundu kalla þetta fífldirfsku. Endurspeglar þessi ákvörðun tilgang ofangreindra laga? Reykjavíkurborg hefur þó ítrekað vakið athygli á því hversu leikskólar eru vel reknir af stjórnendum þeirra.

Athyglisvert er að í skýrslu sem unnin var fyrir Samband íslenskra sveitarfélaga árið 2010 kemur fram að samrekstur grunn- og leikskóla hjá flestum sveitarfélögum skilaði sér í auknum eða sambærilegum rekstrarkostnaði, en ekki sparnaði. Þá eru nefndir kostir og ókostir samrekstrar leik- og grunnskóla. Svar frá einu sveitarfélagi er að „… faglegi hluti skólastarfs leikskólans færist nánast alfarið yfir á aðstoðarleikskólastjóra og væntan­lega verðum við að bæta það upp á næstunni með því að mæta því í launalið og með meiri stjórnunar­tíma". Annað sveitarfélag nefnir: „Helsti gallinn er lítil þekking skólastjóra á leikskólastarfi og er það stór galli. Því funkera deildarstjórar sem skólastjórar í faglegu starfi og skólastjóri sér í raun bara um rekstrarleg og starfsmannamál."

Stjórn samtaka foreldrafélaga í Reykjavík lýsir yfir miklum áhyggjum af framvindu leikskólamála í borginni. Við tökum undir yfirlýsingu frá samtökum foreldra grunnskólabarna í sl. mánuði um að „Enn frekari aðgerðir munu skaða skólastarfið um ókomna framtíð með ófyrirsjáanlegum afleiðingum fyrir börnin okkar. Við sættum okkur ekki við það." Þegar sam­félög ganga í gegnum efnahags­kreppur og aukið álag leggst á fjölskyldur er sem aldrei fyrr mikil­vægt að hlúa að velferð barna. Eðlilegra er á tímum sem þessum að auka fjármagn til menntamála og styðja þannig við grunnstoðir samfélagsins í stað þess að höggva enn frekar í þær. Fundur verður haldinn með foreldrum í borginni 24. febrúar kl. 20 í Hlöðunni í Gufunes­bæ til að ræða þessi mál enn frekar.