HM 2011: Rússland, Brasilía og Danmörk taplaus í gegnum riðlakeppnina

Í gærkvöldi lauk riðlakeppninni á HM í handbolta kvenna í Brasilíu. Heimsmeistarar Rússlands, gestgjafar Brasilíu og Danir eru einu liðin sem fengu fullt hús stiga í riðlakeppninni.

Evrópumeistarar Noregs sigruðu A-riðil með átta stigum en Norðmenn töpuðu afar óvænt fyrir Þýskalandi í fyrstu umferð. Þjóðverjar töpuðu hins vegar svo fyrir Svartfjallalandi, Íslandi og Angóla og komust ekki einu sinni áfram í 16-liða úrslitin.

Angóla, Svartfjallaland og Ísland fengu öll sex stig en Angóla náði öðru sæti riðilsins með besta markahlutfallinu í innbyrðisviðureignum þessara þriggja liða. Svartfellingar enduðu í þriðja sæti en stelpurnar okkar máttu sætta sig við fjórða sætið.

Munaði þar mestu um í útreikningunum að Ísland tapaði með Angóla með fjögurra marka mun fyrr í þessari viku.

B-riðill

Rússland og Spánn voru fyrir löngu búin að tryggja sér tvö efstu sætin í B-riðli en Suður-Kórea og Holland mættust í gær í hreinum úrslitaleik um þriðja sæti riðilsins. Þar hafði Suður-Kórea öruggan sigur, 38-26, og mætir Angóla í 16-liða úrslitunum. Hollendingar mæta hins vegar Norðmönnum.

Spánverjar mæta svo Svartfellingum í 16-liða úrsiltunum og Rússland mætir Íslandi, sem kunnugt er.

C-riðill

Heimamenn hafa verið frábærir í keppninni í Brasilíu til þessa. Þeir gerðu sér lítið fyrir og unnu alla leiki sína í riðlinum en þeir voru til að mynda með gríðarlega sterku liði Frakka í riðli.

Brasilía vann í gær nauman sigur á Túnis, 34-33, en síðarnefnda þjóðin komst ekki áfram í 16-liða úrslitin og keppir því í Forsetabikarnum. Frakkar urðu í öðru sæti með átta stig en Rúmenía og Japan komu næst með fimm.

Rúmenar fara áfram á betra markahlutfalli en Japan en liðin skildu jöfn í sínum leik í riðlakeppninni. Japanar hafa komið skemmtilega á óvart í keppninni en liðið var í neðsta styrkleikaflokki þegar dregið var í riðla - rétt eins og Ísland.

D-riðill

Danir unnu alla leiki sína í D-riðli, nú síðast gegn Svíum í spennandi leik í gær, 20-19. Það dugði til að tryggja sér sigur í riðlinum og senda Svíana niður í þriðja sætið.

Króatía varð í öðru sæti og Fílabeinsströndin í því fjórða. Síðastnefnda þjóðin mætir því Brasilíu í 16-liða úrslitunum en Króatía mætir Rúmeníu.

Danir ættu að eiga greiða leið inn í fjórðungsúrsiltin því liðið mætir Japönum í 16-liða úrslitunum. Ein athyglisverðasta viðureignin í 16-liða úrslitunum verður viðureign Svíþjóðar og Frakklands á mánudaginn kemur.

Leikjayfirlit og úrslit á HM í Brasilíu.