Umfjöllun: Breiðablik vann stórsigur á Þór í Kópavogi

Breiðablik vann stórsigur á Þórsurum í 10. umferð Pepsi-deildar karla í knattspyrnu í dag. Lokatölurnar 4-1 en úrslitin gefa þó ekki alveg rétta mynd af leiknum. Þórsarar spiluðu vel á köflum og sköpuðu sér fín færi.

Blikar mættu mun ákveðnari til leiks í bongóblíðuna í Kópavogi í dag. Með Kristinn Steindórsson í broddi fylkingar stjórnuðu Blikar fyrri hálfleiknum og sköpuðu sér fjöldan allan af færum. Þeir létu vaða á markið við hvert tækifæri en Srdjan Rajkovic var í banastuði í marki Þórs.

Þórsarar voru allt annað en sáttir um miðjan hálfleikinn. Þá var Sveinn Elías Jónsson við það að sleppa í gegn en Kári Ársælsson tæklaði hann. Menn eru ósammála hvort Kári hafi farið í boltann eða Svein Elías en Kristinn Jakobsson sá ekki ástæðu til þess að flauta. Kári var á gulu spjaldi þ.a. honum hefði verið vikið af velli fyrir brotið.

Það var einmitt Kári sem kom Blikum á bragðið. Rafn Andri tók hornspyrnu frá vinstri, Rajkovic fór í úthlaup en náði ekki til boltans fyrir fjölmenninu í teignum. Kári Ársælsson þakkaði fyrir sig og skallaði boltann í opið markið. Klaufalegt hjá Rajkovic sem hatar ekki skógarferðirnar.

Blikar héldu tökum á leiknum en Þórsarar sóttu þó í sig veðrið. Þeir voru óhræddir að skjóta á markið en skotin flest misheppnuð og lítið að gera hjá Ingvari í marki Blika. Fjórum mínútum fyrir leikhlé bættu Blikar við marki. Guðmundur Kristjánsson fékk þá boltann inn í teig Þórsara eftir aukaspyrnu og náði að stýra honum í netið.

Allt útlit var fyrir örugga forystu Blika í hálfleik en á lokamínútu hálfleiksins kviknaði von hjá Þórsurum. Þá skoraði David Disztl af stuttu færi og staðan í hálfleik 2-1.

Í síðari hálfleik mættu Þórsarar grimmari til leiks. Þeir sköpuðu sér fín skotfæri úr teignum sem nýttust ekki. Blikar skoruðu þriðja markið gegn gangi leiksins þegar Dylan Macallister skoraði með skalla úr teignum. Tíu mínútum síðar bætti Kristinn Steindórsson við fjórða markinu.

Í kjölfarið höfðu Blikar góð tök á leiknum, fengu færi til þess að bæta við mörkum en 4-1 sigur staðreynd. Blikar geta verið hæstánægðir með sigurinn þótt lokatölurnar gefi ekki alveg rétta mynd af leiknum. Þórsarar geta nagað sig í handarbakið enda fengu þeir færin til þess að skora fleiri mörk.

Blikar fara upp í 5. sætið með sigrinum en Þórsarar sitja áfram í 9. sæti.

TölfræðiSkot (á mark): 20-16 (13-6)

Varin skot: Ingvar 5 – Srdjan 9

Horn: 10-2

Aukaspyrnur fengnar: 11-10

Rangstöður: 0-2

Áhorfendur: 615

Dómari: Kristinn Jakobsson 7