Ólafur Kristjánsson: Ánægður með þessa niðurstöðu

„Ég var að vona að við myndum fá lið frá Skandinavíu þannig að ég er bara ánægður með þessa niðurstöðu. Og það skemmir ekki fyrir að Þrándheimur er vinabær Kópavogs," sagði Ólafur Kristjánsson þjálfari Íslandsmeistaraliðs Breiðabliks sem mætir liði Rosenborg í 2. umferð Meistaradeildar Evrópu í fótbolta.

Fyrri leikurinn fer fram í Noregi 12. eða 13. júlí og er Ólafur nokkuð sáttur við það. „Það er að mínu mati kostur að leika úti fyrst, þá getum við aðeins þreifað fyrir okkur og unnið úr því. Þetta lið er mjög sterkt en þeir eru í smá lægð núna eftir nýr þjálfari tók við liðinu fyrir þetta tímabil. Þetta er verkefni sem við ætlum okkur að standa okkur vel í og markmiðið er að vinna leik í þessari keppni. Kosturinn við að fá lið frá Noregi er að þetta er þekkt stærð. Við getum fengið upplýsingar um liðið með einföldum hætti," sagði Ólafur.

Síðari leikurinn fer fram á Kópavogsvelli 19. eða 20. júlí.