Umfjöllun: Verðskuldaður sigur Þórs

Þór frá Akureyri tryggði sér í kvöld sæti í átta liða úrslitum Valitor-bikarsins í knattspyrnu með 3-1 sigri á Víkingi á Akureyri. Eins og venjulega þetta sumarið var nokkuð kalt í veðri á Akureyri þegar Þórsarar tóku á móti Víkingum á Þórsvellinum í kvöld. Heimamenn virðast kunna nokkuð vel við sig í kuldanum því þeir unnu sinn annan sigur í þrem leikjum á Þórsvellinum.

Fyrri hálfleikur á Þórsvellinum í kvöld var nokkuð skemmtilegur þótt lítið væri um fagra knattspyrnu . Víkingar voru örlítið meira með boltann en það voru Þórsarar sem áttu hættulegri færi, flest eftir stungusendingar inn fyrir vörn Víkinga eða löng innköst Gísla Páls Helgasonar.

Það var einmitt upp úr löngu innkasti hjá Gísla sem fyrsta mark leiksins kom. Gísli grýtti þá boltanum alla leið inn á nærstöng þar sem barátta var um boltann sem endaði með því að Magnús Þormar markvörður Víkinga hreinlega sló boltann í eigið net. Víkingar voru afar ósáttir og töldu brotið á Magnúsi en ekkert var dæmt, annað en gult spjald á Magnús fyrir mótmæli.

Eftir þetta atvik fengu bæði lið ágætis færi á að skora, það besta hjá Þór fékk Sigurður Marinó Kristjánsson þegar hann fékk boltann algjörlega einn og óvaldaður á teignum en slakt skot hans fór beint á Magnús í marki Víkinga. Víkingar fengu hins vegar vítaspyrnu sem Walter Hjaltested tók, en Björn Hákon Sveinsson markvörður Þórsara gerði sér lítið fyrir og varði vítaspyrnu Walters. Í hálfleik var staðan því 1-0 fyrir heimamenn.

Síðari hálfleikur var ekki nema nokkurra mínútna gamall þegar að Víkingur höfðu jafnað leikinn með glæsimarki Halldórs Smára Sigurðssonar. Halldór fékk þá boltann á lofti rétt utan vítateigs Þórsara og lét vaða á markið viðstöðulaust og boltinn söng í netinu. Frábært mark.

Nokkuð jafnræði var með liðunum eftir þetta og fengu bæði lið ágætis færi á að skora. Næsta mark kom þó ekki fyrr en á 78. mínútu þegar að Sveinn Elías Jónsson skoraði af stuttu færi á fjærstöng eftir skot Jóhanns Helga Hannessonar hafði farið af varnarmanni og borist til Sveins.

Það sem eftir var voru Þórsarar frekar sterkari aðilinn og líklegri til að bæta við en Víkingar að jafna. Það var svo á lokasekúndunum sem Gunnar Már Guðmundsson innsiglaði 3-1 sigur Þórsara. Sveinn Elías Jónsson átti þá skot í þverslá Víkingsmarksins, þaðan barst boltinn á Gunnar Má sem hreinlega gat ekki annað en skorað einn og óvaldaður fyrir framan markið.

Stuttu síðar flautaði góður dómari leiksins Guðmundur Ársæll Guðmundsson af og verðskuldaður sigur Þórs í höfn.