Halldór Áskels: Vöknuðum er þeir jöfnuðu

Gamla kempan Halldór Áskelsson, aðstoðarþjálfari Þórsara, var sæmilega sáttur við leik sinna manna gegn Víkingum í kvöld.

„Mér fannst við lélegir í fyrri hálfleik þrátt fyrir að vera 1-0 yfir í hálfleik. En þegar að þeir jöfnuðu var eins og við vöknuðum til lífsins og mér fannst við sterkari aðilinn í leiknum eftir það, enda skoruðum við tvö fín mörk."

Víkingar voru mjög ósáttir við að fyrsta mark leiksins þegar að Magnús Þormar markvörður þeirra kýldi boltann í eigið mark eftir að þjarmað var að honum í teignum. Halldóri finnst gestirnir hafa nokkuð til síns máls.

„Mér fannst þetta frekar vafasamt og skil þá vel að vera ósáttir við þetta. En á móti kemur að við hefðum getað fengið víti þegar boltinn fór í hönd varnarmanns hjá þeim og við fengum á okkur frekar ódýrt víti þegar að hendi var dæmd á okkar mann innan teigs, þannig að allt jafnaðist þetta út að lokum,“ sagði Halldór.

Þórsarar féllu nokkuð aftarlega á völlinn eftir að hafa skorað fyrsta mark leiksins.

„Það er alls ekki meðvitað hjá okkur að falla svona aftur á völlinn þegar við skorum, eins og hefur gerst í síðustu leikjum. Þetta er frekar bara ósjálfrátt hjá leikmönnum, menn vilja verja forskotið og jafnframt eflist hitt liðið í að vilja sækja,“ sagði Halldór.