Segir Íra geta hjálpað Íslendingum í erfiðustu köflunum

Komið yrði fram við Íslendinga eins og jafningja í Evrópusambandinu og íslenska ríkið yrði leiðandi þjóð í sjávarútvegsmálum í sambandinu. Þetta segir Evrópumálaráðherra Írlands. Þá muni forsæti Íra í sambandinu árið 2013 aðstoða við að ljúka viðræðum um erfiðustu kaflana eins og sjávarútveg.

Írar voru í vægast sagt afleitri stöðu eftir bankahrunið því írska ríkið ábyrgðist allar skuldir bankakerfisins þar í landi, ólíkt Íslendingum. Lucinda Creighton, Evrópumálaráðherra Íra, segir að nú hafi taflið snúist við og staða Íra sé mun betri. Hún segir að það hafi verið rétt ákvörðun að þjóðnýta bankana og ábyrgjast skuldir þeirra.

„Á mjög stuttum tíma er hægt að snúa ástandinu við. Við höfum náð tökum á ríkisfjármálunum, fjárfestar hafa mikla trú á Írlandi, atvinnuleysið hefur náð jafnvægi og við höfum náð hagvexti á þessu ári," segir Creighton.

Creichton er 31 árs en hún var aðeins 27 ára er hún tók sæti í ríkisstjórn Írlands. Írar verða með forsæti í ESB árið 2013, en stjórnvöld stefna að því að ljúka viðræðum við sambandið þá.

„Helstu þjóðarhagsmunir Íslendinga eru í kaflanum um fiskveiðar. Ef þeim kafla verður ekki lokið getum við verið í aðstöðu til að aðstoða við það því Írar stunda líka sjávarútveg og skilja hve viðkvæmt málið er og við myndum með ánægju aðstoða Íslendinga að þessu leyti."

Telur þú að ef Íslendingar ganga í ESB muni þeir hafa eitthvað að segja um sameiginlega fiskveiðistefnu og hafa forystu í því að koma þeirri stefnu í framkvæmd?

„Án nokkurs vafa. Ég held að ESB geti lært mikið að Íslendingum og ef við lítum á sjálfbærnina í fiskveiðistjórnun ykkar þá tel ég að ESB sé að færast í þá átt og að líklegt sé mikil samstilling eigi sér stað á næstu árum," segir Lucinda Creighton, Evrópumálaráðherra Íra. thorbjorn@stod2.is