Furða sig á afstöðu Lýsingar

Samtök iðnaðarins segja það vekja furðu að fjármögnunarfyrirtækið Lýsing hafi í kjölfar gengisdóms sem féll í gær sent frá sér yfirlýsingu um að niðurstaða hans hafi ekki fordæmisgildi gagnvart fyrirtækinu.

Í málinu var fjármögnunarsamningur sem þrotabú Kraftvélaleigunnar gerði við Íslandsbanka dæmdur ógildur. Lýsing telur að samningur Íslandsbanka sé í veigamiklum atriðum frábrugðinn fjármögnunarleigusamningum Lýsingar.

Samtök iðnaðarins segja að ekki sé að finna í umræddri yfirlýsingu skýringar á því að hvaða leyti samningarnir séu frábrugðnir samningi Íslandsbanka. Samtök iðnaðarins benda á að Lýsing lýsti kröfu vegna nokkurs fjölda fjármögnunarleigusamninga í þrotabú Kraftvélaleigunnar. Það veki því óneitanlega athygli að Lýsing hafi ekki látið reyna á lögmæti sinna krafna gagnvart þrotabúinu, samhliða kröfum Íslandsbanka hf., fyrir dómstólum.

SI krefjast þess einnig að Lýsing virði afdráttarlausa niðurstöðu Hæstaréttar og hefjist nú þegar handa við að endurreikna fjármögnunarleigusamninga í samræmi við dóm réttarins. Ennfremur hafa Samtökin hvatt félagsmenn sína sem eru í viðskiptum við Lýsingu vegna fjármögnunarleigusamninga að haga greiðslum sínum til fyrirtækisins í samræmi við niðurstöðu Hæstaréttar. 

Samtök iðnaðarins segja jafnframt að þau muni leita álits Fjármálaeftirlitsins á afstöðu Lýsingar til dóms Hæstaréttar.