Rúnar: Vissi að við gætum gert tilkall til beggja titla

Rúnar Kristinsson, þjálfari KR, sagði það stóra stund fyrir uppalinn KR-ing að vinna Íslandsmeistaratitilinn. Rúnar náði ekki í þann stóra sem leikmaður en hefur stýrt KR til sigurs í deild og bikar á sínu fyrsta heila tímabili með liðið.

„Já, hún er hrikalega stór. Að vera uppalinn KR-ingur og ná þessum árangri með liðið er frábært. Ég er gríðarlega stoltur, aðallega af leikmönnunum, stjórn félagsins og þeim mönnum sem ég hef starfað með. Þeir hafa lagt mikið á sig og við unnið þetta vel saman. Ég er gríðarlega ánægður með árangurinn.“

Rúnar sagðist hafa haft trú á að liðið gæti gert góða hluti í sumar.

„KR-liðið hefur verið mjög gott undanfarin ár. Þetta lið hefur verið í uppbyggingu frá því Logi (Ólafsson) kom hingað til starfa. Ég tók við af honum, hélt þessu gangandi og bætti við nokkrum áherslum sem hafa virkað ágætlega.“

„Ég hafði trú á því að við gætum endað svona í sumar. Kannski ekki með báða titlana en ég vissi að við gætum gert tilkall til beggja. Að vinna báða var kannski ekki það sem maður átti von á.“

Sigurganga KR í sumar hefur verið með ólíkindum. Liðið hefur aðeins tapað einum leik í deildinni og fór alla leið í bikarnum.

„Við erum með gott lið. Við lögðum upp með það í sumar að verða eitt af fjórum liðum sem væru að berjast um titilinn þegar að endanum kæmi. Við gerðum það og stóðum uppi sem sigurvegarar. Það hefðu allt eins getað verið Vestmannaeyjar, FH eða Valur þess vegna. Það eru mörg frábær lið í þessari deild. Við vissum að við værum eitt af þessum sem áttu möguleika.“

Óskar Örn Hauksson meiddist illa um mitt sumar og við það riðlaðist leikur KR-inga. Óskar Örn hafði spilað frábærlega og líklega verið besti leikmaður mótsins.

„Það var gríðarlega slæmt fyrir okkur að missa hann. Við misstum bit á vinstri vængnum við það. Inn kom Björn Jónsson og Egill Jónsson kom sterkur inn. Dofri spilaði mikið. Við þurftum að gera breytingar en héldum þetta út.

„Við áttum kannski ekki mikið af fallegum leikjum eftir þetta en vorum duglegir að safna stigum. Meðan hin liðin voru ekki að klára sína leiki héldum við toppsætinu. Við stigum svo upp í restina gegn Grindavík, úti í Eyjum, í Keflavík og aftur í dag. Þó svo að leikurinn í dag hafi ekki verið frábær þá höfum við spilað vel síðustu þrjá,“ sagði Rúnar Kristinsson og fór í Íslandsmeistaramyndatöku með liði sínu.