Heimir Guðjónsson: Við stimpluðum okkur út úr titilbaráttunni í kvöld

Heimir Guðjónsson þjálfari FH-inga var fúll með spilamennsku sinna manna eftir 1-1 jafntefli gegn Fram. Heimir telur að með þessum töpuðu stigum sé vonin um titil orðin að engu.

„Við spiluðum ekki nógu vel. Miðað við það sem var undir þá fannst mér liði ekki leggja sig nóg fram þegar kom að því að berjast. Framarar börðust meira en við. Þetta lagaðist aðeins í seinni hálfleik og þá fengum við nokkur góð færi og vorum alltaf líklegir. Við vissum það fyrir leikinn að Fram liðið hefur verið að bæta sig mikið og það mátti auðvitað búast við erfiðum leik," sagði Heimir.

„Það eru líka sérstaklega mikil vonbrigði að fá ekki 3 stig í ljósi úrslitanna í hinum leikjunum. Við komum okkur inn í mótið á sunnudaginn með góðum sigri á KR en því miður stimpluðum við okkur út úr baráttunni í kvöld. Þetta var okkar allra síðasti séns. Því miður náðum við ekki að grípa þessa líflínu sem kastað var til okkar eftir KR sigurinn. Nú verðum við bara að ljúka þessu almennilega og gera þetta Evrópusæti að okkar," sagði Heimir að lokum.