Mótastjóri KSÍ: Langur og erfiður dagur í gær

Fimm leikjum var frestað í Pepsideild karla í gær vegna veðurs og vallaraðstæðna og eru skiptar skoðanir um þá ákvörðun. Leikur Vals og Þórs var eini leikurinn sem fór fram í gær og voru aðstæður erfiðar, rigning og hávaðarok. „Þetta var langur og erfiður dagur í gær," sagði Birkir Sveinsson mótastjóri Knattspyrnusambands Íslands í samtali við Vísir í morgun.

Leikur ÍBV og KR er án efa stórleikur umferðarinnar en þeim leik var frestað í gær þar sem að KR liðið og dómarar leiksins komust ekki til Vestmannaeyja að sögn Birkis:

„Eftirlitsmaður KSÍ var mættur til Vestmannaeyja í gær og hann taldi að það væri leikhæft í Eyjum en samgöngumálin voru ekki í lagi. Það var ekki hægt að koma liðunum né dómurunum til Eyja. Þeim leik var því frestað. Skömmu fyrir hádegi höfðu Grindvíkingar samband og við sendum eftirlitsmann á svæðið til að taka út aðstæður. Hann taldi að ekki væri hægt að leika fótbolta í Grindavík og þeim leik var því frestað.

Önnur lið höfðu ekki samband fyrr en um tvö í gær. Þá hringdu forráðamenn Fram og tjáðu mér að auglýsingaskilti og fánaborgir væru að fjúka í Laugardalnum. Í kjölfarið fer boltinn af stað hjá okkur og ég keyrði síðan sjálfur úr Hveragerði þar sem ég bý til þess að taka út leikstaðina. Ég boðaði dómarana fyrr á svæðið og til þess að geta tekið ákvörðun fyrr á staðnum og auk þess til þess að kanna vilja félagana til þess," sagði Birkir en hann bætti því við að erfið staða hafi komið upp varðandi leik Vals og Þórs.

„Það sem er sérstakt í þessu máli er að Þórsararnir eru komnir til Reykjavíkur og eftir að hafa kannað viljann hjá þjálfurunum hvort þeir vilji spila þá er bara farið af stað og leikurinn fór fram. Okkur bar skylda til þess að setja leikinn í gang þar sem Þórsararnir voru komnir á svæðið. Auðvitað eru skiptar skoðanir um þá ákvörðun," sagði Birkir í samtali við Vísir í dag.

Fimm leikir eru á dagskrá í dag þegar 20. umferð lýkur: Leikur ÍBV og KR hefst kl. 17.00 og verður hann í beinni útsendingu á Stöð 2 sport. Þrír aðrir leikir hefjast á sama tíma, Breiðablik – Víkingur, Grindavík – FH og Fylkir Stjarnan. Leikur Fram og Keflavíkur hefst kl. 19.15 á Laugardalsvelli.