Eiður Smári: Koma betri tímar aftur

Eiður Smári Guðjohnsen vonast til þess að íslenska landsliðið í knattspyrnu hafi tekið út sinn skammt af erfiðleikum og að bjartir tímar séu fram undan. Ísland mætir Kýpur annað kvöld.

„Ég held að við munum reyna að rífa okkur aðeins upp,“ sagði Eiður Smári í viðtali við Arnar Björnsson en viðtalið má sjá í heild sinni hér fyrir ofan. „Við munum reyna að vinna leikinn eins og alltaf og er kannski kominn tími til þess.“

„Það er ekki mikil jákvæðni í kringum íslenska landsliðið og eðlilega þegar úrslitin eru ekki að falla með okkur myndast ekki mikil stemning í kringum liðið. Neikvæð skrif fjölmiðla vilja oft breiðast út og fleira í þeim dúr. En það þýðir ekkert að hengja haus - það koma betri tímar aftur. Vonandi erum við búnir að ganga í gegnum okkar erfiðustu tíma og að það sé bjart fram undan.“

Hann segir að öll gagnrýni hafi sitt að segja. „Öll gagnrýni hefur einhvers konar áhrif. Oft getur hún haft jákvæð áhrif en nú held ég að við séum komnir svolítið langt niður. Við reynum að láta þetta ekki á okkur fá en vissulega hefur þetta áhrif.“

Eiður segir að hann ætli að halda áfram að gefa kost á sér í íslenska landsliðið. „Ég hef aldrei gefið neitt annað til kynna. Á meðan ég er í standi og get gefið mig allan í þetta mun ég gera það eins lengi og færi gefst.“