Gunnleifur skrefi framar en Haraldur og Hannes

Ólafur Jóhannesson segir að það hafi alltaf legið fyrir að hann myndi kalla aftur á Gunnleif Gunnleifsson, markvörð FH, í íslenska landsliðið.

Gunnleifur var ekki valinn í liðið sem mætti Ungverjalandi í vináttulandsleik fyrr í mánuðinum. Í hans stað valdi hann Harald Björnsson, Val, og Hannes Þór Halldórsson, KR.

„Gunnleifur á síðustu metrunum í fótbolta sökum aldurs. Þó svo að hann eigi mögulega nokkur ár eftir sem hann telur vafalaust sjálfur. En aldurinn er svolítið mikill á honum,“ sagði landsliðsþjálfarinn Ólafur Jóhannesson á blaðamannafundi KSÍ í gær.

Þá valdi hann þá Gunnleif og Stefán Loga Magnússon í íslenska landsliðið sem mætir Noregi og Kýpur í byrjun næsta mánaðar.

„Vegna þess var ákveðið að fara með þá markverði sem hafa staðið sig einna best í deildinni hér heima til Ungverjaland - þá Hannes Þór og Harald.“

„En það var aldrei neinn efi í mínum huga um að Gunnleifur kæmi aftur inn í liðið fyrir þessa leiki. Ég tel að Gunnleifur sé enn skrefi framar en þessir báðir - þá sérstaklega reynslunnar vegna. Það kom aldrei annað til greina en að velja hann í hópinn nú.“

Þá vakti einnig athygli að Veigar Páll Gunnarsson var valinn í hópinn nú. Hann leikur með Vålerenga í Noregi en hann var áður á mála hjá Stabæk í mörg ár.

„Hann er fínn fótboltamaður og við erum að fara að spila við Noreg þar sem margir Íslendingar eru að spila. Það gefur mönnum örugglega aukakraft.“