Rúnar: Trúðum alltaf að við myndum sigra

Rúnar Kristinsson þjálfari KR var að vonum ánægður eftir sigurinn á Víkingi í kvöld þar sem toppliðið þurfti virkilega að hafa fyrir sigrinum á liðinu í næst neðsta sæti.

„Ég er virkilega sáttur við að við höldum áfram að reyna að sækja þessi þrjú stig þó við værum manni færri og mínir menn sýndu mikla baráttu og vilja þó þeir væru orðnir mjög þreyttir og lúnir þegar leið á. Innst inni trúðu þeir því allan leikinn að þeir gætu skorað og unnið leikinn og það lýsir sjálfstraustinu, viljanum og gleðinni í liðinu,“ sagði Rúnar að leiknum loknum.

„Við náðum að halda boltanum ágætlega og meðan að við gerum það gátu menn hvílt sig aðeins. Menn gerðu það nokkuð vel í seinni hálfleik. Víkingar komu nokkuð á óvart að pressa ekki meira en þeir gerðu og leyfðu okkur að hafa boltann en við erum með mikið sjálfstraust og þora að halda boltanum og spila honum á milli sín og gerðu Víkingum erfitt fyrir að ná boltanum.“

Fyrr í dag gerðu ÍBV og Valur jafntefli og vissu KR-ingar því að þeir gætu náð fjögurra stiga forystu á toppi deildarinnar auk þess að eiga leik til góða með sigri í kvöld.

„Það er ekkert sérstaklega gott fyrir þjálfarann að ganga inn í klefann og allir vissu hvernig hinn leikurinn fór. Það vissu allir að við gátum sótt okkur smá forystu en það er alltaf hættulegt. Menn geta ekki treyst á hin liðin, við verðum að treysta á okkur sjálfa. Ef við förum ekki út á völlinn og vinnum okkar vinnu þá vinnum við aldrei neitt. Ég lagði áherslu á það fyrir leikinn. Hvort hin liðin misstíga sig eða ekki, við getum ekkert gert í því, við getum bara séð til þess að við vinnum okkar leiki og sjáum svo hverju það skilar okkur.“

Framganga Víkinga í leiknum kom Rúnari ekki á óvart. „Það hefur verið stígandi í þeirra leik eftir að Bjarnólfur tók við og þeir vörðust fimlega. Svo lendum við auðvitað í því að fá rautt spjald á okkur. Ég held að dómarinn hafi gert hárrétt í því. Guðmundur fór í glórulausa tæklingu. Honum fannst sjálfur að hann hafi tekið boltann en hann sýndi marga takka. Í þessu tilfelli sá dómarinn ástæðu til að reka hann útaf þó maður hafi séð menn sleppa með svona tæklingar.“

Þetta rauða spjald hefur þær afleiðingar fyrir KR og Guðmund að hann missir af bikarúrslitaleiknum gegn Þór á laugardaginn. „Það er mjög slæmt að missa Guðmund Reyni í bikarúrslitaleik en ég verð að treysta þeim mönnum sem ég er með. Ég er með breiðan og góðan hóp, fullt af góðum leikmönnum og ég treysti þeim til að fylla þau skörð sem í liðið eru höggin,“ sagði Rúnar að lokum.