Fylkir og Haugesund í viðræðum um Andrés Má

Fylkismaðurinn Andrés Már Jóhannesson gæti verið á förum til norska knattspyrnufélagsins Haugesund. Norska félagið hefur gert tilboð í miðjumanninn og viðræður standa yfir milli félaganna. Kjartan Daníelsson formaður knattspyrnudeildar Fylkis staðfesti þetta við Vísi í dag.

Andrés Már kom heim til Íslands í gærkvöldi eftir nokkurra daga veru hjá norska félaginu. Hann spilaði meðal annars æfingaleik með Haugesund og þótti standa sig vel í stöðu hægri bakvarðar. Á heimasíðu norska félagsins er Andrési Má lýst sem hörðum leikmanni sem geti bæði leyst af hendi bakvarðarstöðuna og spilað á miðjunni.

Félagaskiptaglugginn í Noregi opnar þann 1. ágúst. Norska deildakeppnin er í fullum gangi um þessar mundir. Því er líklegt að Haugesund vilji fá Andrés út sem fyrst ef af samingum verði að sögn Kjartans. Viðræður standa yfir en Kjartan segir líkur á því að gengið verði frá málinu um helgina.

Andrés Már hefur spilað vel með Fylkisliðinu í sumar líkt og í fyrra. Hann var í leikmannahópi U21 árs landsliðsins á Evrópumótinu í Danmörku.