Pace var skel Landsbankans til að lána meira í fasteignaævintýri

Huldufélagið Pace Associates í Panama var skúffufélag sem Landsbankinn í Lúxemborg útbjó en félagið var síðan látið fjármagna fasteignasjóð á Indlandi. Baugur, Hannes Smárason og Kevin Stanford voru meðal hluthafa í sjóðnum.

Hinn 24. apríl 2007 lánaði Fons félaginu Pace Associates þrjá milljarða króna og voru peningarnir millifærðir inn á reikning Pace hjá Landsbankanum í Lúxemborg, samkvæmt millifærslukvittun í bókhaldi Fons. Lánið átti að greiða til baka í apríl 2010 en engin greiðsla barst.

Óskar Sigurðsson, skiptastjóri Fons, hefur nú í á annað ár verið að reyna að komast að því hvað varð um peningana, en Pálmi Haraldsson, sem var aðaleigandi Fons, gaf þær skýringar í skýrslutöku hjá skiptastjóranum að Pace hafi fjárfest í fasteignaverkefnum á Indlandi og millifærslan inn á reikning Pace hafi verið lánveiting til þessa sama verkefnis.

Pálmi Haraldsson sagði við fréttastofu að Hannes Smárason og Landsbankinn í Lúxemborg hefðu kynnt verkefnið fyrir sér á sínum tíma. Pálmi gat ekki svarað því um hvaða fasteignaverkefni hefði verið að ræða og hvar á Indlandi félagið hefði fjárfest.

Eins og komið hefur fram er millifærslan frá Fons til Pace nú til rannsóknar, en Ólafur Þór Hauksson, sérstakur saksóknari, staðfesti við fréttastofu að þriggja milljarða króna lánveiting frá Fons til Pace Associates væri til rannsóknar hjá embættinu en vildi ekki tjá sig að öðru leyti um málið. Stöð 2 hefur hins vegar heimildir fyrir því að meðal gagna sem embættið hafi undir undir höndum séu skjöl sem tengi Hannes Smárason við félagið Pace Associates.

Hannes Smárason var þó ekki einn á bak við verkefni sem Pace fjármagnaði. Um er að ræða sjóðinn Terra Firma, sem samkvæmt upplýsingum fréttastofu var í eigu Baugs Group, Hannesar, Kevin Stanford og fleiri fjárfesta. Þá átti Landsbankinn í Lúxemborg sjálfur 20 prósenta hlut. Terra Firma fjárfesti í fasteignaverkefnum á sviði atvinnuhúsnæðis á Indlandi. Stöð 2 hefur undir höndum gögn sem sýna fjárfestingar Terra Firma í borgunum Chennai, Kerala og Pune á Indlandi. Ein af fasteignunum var risavaxið atvinnuhúsnæði (260 þúsund fermetrar) fyrir bandaríska tölvurisann IBM í Pune.

Fréttastofan hefur heimildir fyrir því að Pace fléttan hafi verið útbúin af Landsbankanum í Lúxemborg til að klára fjármögnun fyrir Terra Firma. Bankinn stofnaði Pace Associates sem gaf út skuldabréf sem Fons og fleiri fjárfestar keyptu. Pace Associates fjármagnaði síðan Terra Firma verkefnið og tryggði fjármögnun þess. Þeir sem keyptu skuldabréfin af Pace, eins og Fons, fjárfestu því með óbeinum hætti í Terra Firma verkefninu.

Pálmi Haraldsson sagði við fréttastofu í dag að þetta væri meira en hann vissi um verkefnið á Indlandi. „Takk fyrir að láta mig vita, þetta er meira en ég veit," sagði hann. Pálmi sagði að þriggja milljarða króna millifærslan inn á reikning Pace hjá Landsbankanum hefði verið greiðsla fyrir kaupin á skuldabréfinu, en hvorki Fons né hann sjálfur hefðu verið hluthafar í Pace á neinum tímapunkti.

Heimildarmenn fréttastofunnar segja óskiljanlegt að Landsbankinn í Lúxemborg hafi neitað skiptastjóra Fons sem og öðrum um upplýsingar um Pace Associates, enda liggi eignarhald og fyrirkomulag félagsins skýrt fyrir, en Landsbankinn hefur hingað til borið fyrir sig bankaleynd.

Fram kom í fréttum í síðustu viku að annað félag á vegum fyrirsvarsmanna Pace, þeirra Francis Perez og Leticia Montoya hafi ásamt fleirum verið notað til að þvætta peninga fyrir fyrrverandi forseta Níkaragva, Arnoldo Alemán. Svo virðist sem Pace Associates hafi verið eitt af mörg hundruð félögum sem þau hafi verið í fyrirsvari fyrir, en vel þekkt er víða um veröld að fólk hafi það starf eitt að hýsa félög fyrir aðra. Það þekkist á Tortóla á Jómfrúreyjum og einnig í Panama. Það var Landsbankinn í Lúxemborg sem átti frumkvæðið að því að finna hina umdeildu fyrirsvarsmenn sem virðast hafa það að aðalstarfi að hýsa félög fyrir aðra. thorbjorn@stod2.is