Ólafur Örn: Áttum að klára þetta í síðari hálfleik

Ólafur Örn Bjarnason, þjálfari Grindavíkur, var eðilega sár og svekktur eftir að lið hans féll út úr Valitor-bikarkeppninni á dramatískan hátt í dag gegn Þór á Þórsvellinum.

"Þetta var hvorki sanngjarnt né ósanngjarnt en kannski enn meir svekkjandi en venjulega því markið þeirra kom alveg í blálokin. Við fengum tvö dauðafæri þegar um það bil korter var eftir af venjulegum leiktíma sem við áttum að klára og þá hefðum við unnið leikinn,” sagði Ólafur.

Hann var ekki sammála því að hans lið væri í slakara formi en Þór, en Grindvíkingar gáfu nokkuð eftir í framlengingunni.

"Nei mér finnst við ekki vera í slakara formi, það æfa öll lið ósköp svipað hér á Íslandi og þau eru öll í svipuðu formi. Mér fannst við einfaldlega vera farnir að bíða fullmikið eftir vítaspyrnukeppninni á meðan að þeir voru greinilega ákveðnari í að sækja sigur. Svo kom þetta mark alveg í lokin eins og áður sagði og þá var orðið of seint að bæta fyrir það."