Andri: Mjög sáttur með framlag minna manna

Andri Marteinsson þjálfarin Víkinga var ánægður með leik sinna manna en að sama skapi var hann ekki eins sáttur með úrslit leiksins. Víkingar sem leiddu lengi vel gegn Íslandsmeisturum Breiðabliks misstu leikinn niður í 2-2 jafntefli þegar skammt lifði leiks.

Ég er mjög sáttur með framlag minna hérna í kvöld. Þetta var fyrsti alvöru leikurinn sem menn stíga upp og spila af fullum krafti og dugnaði allan tímann.  Við vorum að mæta mjög sterku liði Blika sem láta boltann vinna vel og því þurfum við að hreyfa okkur mikið og hafa fyrir hlutunum. Það gekk upp hjá okkur það sem við lögðum upp með að bíða eftir þeim og sækja svo hratt á þá.

Það sem ég er kannski helst ósáttur með er að taka bara eitt stig úr leiknum og sérstaklega þegar ég horfi á færin sem við erum að skapa. Því miður gekk ekki að fá 3 stig en eftir frammistöðu kvöldsins er ég fullur bjartsýni á framhaldið.

Ég var bara ánægður með liði í heild sinni og jú fremstu menn skiluðu sínu. Strákur eins og Viktor kemur inn með kraft og gerir vel í að leysa af hólmi eldri og reyndari menn. Þannig að það verður bara lúxusvandamál að velja liðið þegar allir eru orðnir heilir.  

Því miður höfum við verið að berjast svolítið við meiðsli og til dæmis fór Marteinn úr axlarlið í kvöld þannig að þetta er bara eilíf barátta. Þrátt fyrir meiðsli og vesen finnst mér liðið vera að smella saman og ég hef fundið fyrir miklum stígana í liðinu og því komu þessi úrslit mér ekkert á óvart," sagði Andri.