Endurskipulagningu Eikar lokið

Hluthafar og kröfuhafar Eikar fasteignafélags hf. hafa samþykkt endurskipulagningu félagsins í frjálsum samningum og óveðtryggðum kröfum á hendur fyrirtækinu hefur verið breytt í eigið fé. Þá hafa veðtryggðir kröfuhafar skuldbreytt og lengt í lánum Eikar sem tryggir gjaldfærni félagsins og að reksturinn verði traustur um ókomna tíð.

Í tilkynningu segir að endurheimtur óveðtryggðra kröfuhafa eru hærri en kröfurnar sé horft til bókfærðs virðis eigna. Hluthafar eftir endurskipulagningu eru lífeyrissjóðir, fjármálafyrirtæki og eignarhaldsfélög. Skuldir Eikar lækka um 3.4 milljarða kr. og eigið fé hækkar um 3.2 milljarða kr.

Sé miðað við bókfært virði eigna í lok árs 2010 munu óveðtryggðir kröfuhafar fá meira greitt en sem nemur kröfum þeirra á hendur félaginu eða sem nemur 160 prósent af uppreiknuðum kröfum. Alls eru hluthafar félagsins 20 eftir endurskipulagninguna og í þeim hópi eru meðal annars 10 lífeyrissjóðir sem fara með tæp 40 prósent hlut í félaginu, fjármálafyrirtæki og eignarhaldsfélög. Hlutafé félagsins hefur verið hækkað um 90 milljónir kr. og er nú 800 milljónir kr. að nafnvirði.

„Eftir endurskipulagninguna mun Eik sigla á lygnum sjó," segir Garðar Hannes Friðjónsson, forstjóri fyrirtækisins í tilkynningunni. „Eigið fé auk tekjuskattsskuldbindinga hefur hækkað um 3.2 milljarða er nú 4.6 milljarðar. Þá hafa skuldir félagsins hafa lækkað um 3.4 milljarða. Endurskipulagningin er mikið ánægjuefni enda er um að ræða eina af fáum endurskipulagninguna á íslenskum fjármálamarkaði sem lokið er með frjálsum samningum og að teknu tilliti til hve aðkoma margra var nauðsynleg. Framtíð Eikar er björt."

Kjarnastarfsemi Eikar er eftir sem áður útleiga atvinnuhúsnæðis og á félagið yfir hundrað þúsund fermetra af húsnæði. Meira en þrír fjórðu hlutar þess eru á miðsvæði verslunar og viðskipta á höfuðborgarsvæðinu. Á síðasta ári gerði félagið 106 nýja leigusamninga og útleiguhlutfall félagsins hækkaði og var 92 prósent í árslok. Auk stórra leigutaka hefur mikil gróska verið í útleigu lítils húsnæðis til frumkvöðla á sviði verslunar og þjónustu, sem veit á gott fyrir rekstrarárið 2011.

„Okkar tölur benda til þess að rekstrarskilyrði í íslensku efnahagslífi hafi náð vissum stöðugleika, sem skilar sér í minni veltu á leigutökum samhliða aukningu í útleigðum fermetrum," segir Garðar. „Þetta mun skila sér í bættri rekstrarafkomu félagsins, sem veit á gott fyrir bæði efnahagslífið almennt og ekki síður okkar hluthafa," segir Garðar.