Pétur Markan: Ekkert sanngjarnt í fótbolta

„Ég er nokkuð ánægður með okkar leik í kvöld. Við mættum ákveðnir til leiks í fyrri hálfleik og vorum þá betri aðilinn en Þórsarar voru sterkari í síðari hálfleik eftir að við jöfnuðum og börðust einfaldlega bara meira en við fyrir sigrinum,“ sagði Pétur Georg Markan, leikmaður Víkings, eftir tapið gegn Þór í kvöld.

„Það er ekkert sanngjarnt í fótbolta finnst mér og það þýðir ekkert að tala um það hvað er ósanngjarnt og hvað er sanngjarnt í þessu, þeir höfðu þetta í dag,“ sagði Pétur yfirvegaður þegar blaðamaður spurði hann hvort honum hefðu þótt úrslitin sanngjörn.

Varðandi atvikið umdeilda þegar brotið virtist á Magnúsi Þormar, markverði Víkinga, er hann kýldi boltann í eigið mark sagði Pétur.

„Mér fannst þetta allavega vafasamt svo ekki sé nú meira sagt en hins vegar get ég ekki sagt að mér finnist þetta mark ráða úrslitum í leiknum, það er langt því frá að við höfum tapað þessum leik útaf þessu atviki,“ sagði Pétur að lokum.