Lærisveinar Guðjóns flengdu Íslandsmeistara Breiðabliks

BÍ/Bolungarvík gerði sér lítið fyrir í kvöld og sló Íslandsmeistara Breiðabliks úr Valitor-bikarnum. Lokatölur 4-1 eftir framlengdan leik. Staðan eftir venjulegan leiktíma var 1-1.

Arnór Sveinn Aðalsteinsson kom Blikum yfir í fyrri hálfleik með glæsilegu skoti sem söng í horninu á marki heimamanna.

Vestfirðingar gáfust ekki upp og Oluwatomiwo Ameobi náði að jafna leikinn tæpum 20 mínútum fyrir leikslok er hann komst á auðan sjó eftir klafs í teignum.

Blikum gekk illa að skapa færi það sem eftir lifði leiks. Olgeir Sigurgeirsson fékk reyndar dauðafæri nokkrum mínútum fyrir leikslok en skallaði yfir. Það var síðasta færi leiksins og því varð að framlengja.

Bæði lið fengu dauðafæri í fyrri hálfleik framlengingar sem ekki tókst að nýta.

Í upphafi seinni hálfleiks skoraði Sölvi Gylfason stórkostlegt mark. Þrumufleygur fyrir utan teig sem söng í markinu. 2-1 og Blikar í bullandi vandræðum.

Þeir færðu sig framar á völlinn og var refsað skömmu fyrir leikslok er Andri Rúnar Bjarnason skoraði úr teignum. Allt varð vitlaust í kjölfarið og áhorfendur hlupu inn á völlinn til þess að fagna með leikmönnum. Ótrúleg stemning á Torfnesvelli í ótrúlegum leik.

Veislan var ekki búin því Sölvi Gylfason skoraði öðru sinni rétt áður en framlengingin var flautuð af. Lygileg frammistaða hjá Vestfirðingum.