Guðmundur Reynir: Ég er í toppformi

Guðmundur Reynir Gunnarsson var kosinn besti maður vallarins hjá Vísi. Bakvörðurinn knái sýndi oft á tíðum frábær tilþrif og kórónaði leik sinn með sjaldgæfu skallamarki.

„Þetta var frábær sigur og jákvætt að halda okkur á sigurbraut. Mjög sterkt að vinna hérna á útivelli og halda hreinu. Fyrri hálfleikur var erfiður og það var smá bras á okkur,“ sagði Guðmundur Reynir.

„Við náðum samt að halda hreinu marki í fyrri hálfleik og komum svo bara miklu sterkari inn í síðari hálfleikinn. Rúnar sagði okkur að vera þolinmóðir - mörkin myndu að endingu koma. Við höfum stundum verið að byrja illa en höfum náð að vinna vel út úr því með að mæta betur stemmdir til leiks eftir hlé.“

„Ég er ánægður með mína frammistöðu og er í toppformi. Það er líka gaman að skora og þá sérstalega með skalla en svona hlutir gerast þegar allir eru að leggja sig fram eins og gerðist í dag. Mér sýnist við allir vera í toppformi. Það er mikil dagskrá framundan og gott að hafa stóran hóp og það sýndi sig í dag.“