Guðjón veltir því upp hvort dómarar séu með kynþáttafordóma

Guðjón Þórðarson, þjálfari BÍ/Bolungarvíkur, var allt annað en sáttur við dómara leiks síns liðs og Þróttar í gær. Hinn þeldökki framherji BÍ, Tomi Ameobi, fékk þá að líta gula spjaldið í leiknum og er kominn í bann. Guðjón velti því upp í viðtali við Stöð 2 eftir leikinn hvort kynþáttafordómar væru ástæðan fyrir því að Ameobi fengi ekki réttláta meðferð hjá dómurum.

"Ég veit ekki hvort dómurunum líkar ekki litarhátturinn á senternum mínum. Það er allavega geysilega mikið veiðileyfi sem fæst á þann mann. Hann er búinn að fá fjögur spjöld og það er búið að sparka hann niður síðan við byrjuðum mótið og það ætlar engan endi að taka," sagði Guðjón verulega ósáttur.

Guðjón er einnig mjög ósáttur við KSÍ en leikurinn í gær fór fram rúmlega tveim dögum eftir bikarleik BÍ og Blika sem var framlengdur.

Hægt er að sjá viðtalið við Guðjón í heild sinni hér að ofan.