Umfjöllun: Enn syrtir í álinn hjá Fram

FH lagði Fram 2-1 í miklum rokleik í Laugardalnum í kvöld. FH náði þar með að lyfta sér upp í fimmta sæti deildarinnar með 12 stig í átta leikjum, átta stigum frá toppnum en Fram er enn án sigurs með aðeins tvö stig á botni deildarinnar.

Þrátt fyrir vindinn sýndu liðin fín tilþrif í Laugardalnum í kvöld og þrátt fyrir nokkur fín færi kom fyrsta markið ekki fyrr en rétt um mínúta var eftir af fyrri hálfleik. FH-ingar voru mun sterkari í fyrri hálfleik og því var það í takt við gang leiksins að þeir komust yfir með marki Björns Daníels Sverrisson eftir mistök Halldórs Hermanns sem missti boltann klaufalega rétt fyrir utan vítateig.

Fram náði að loka mun betur á spil FH í seinni hálfleik og því var leikurinn ekki eins opinn og í þeim fyrri en fátt benti til þess að FH myndi auka forystuna fyrr en Atli Viðar skoraði annað markið eftir frábæra sendingu Bjarka Gunnlaugssonar.

Skömmu síðar gaf Hannes Þ. Sigurðsson Fram lífsvon með því að láta reka sig af leikvelli og Kristinn Ingi var fljótur að nýta sér það og skoraði þegar enn átta mínútur voru eftir af leiknum. Fram náði ekki að skapa sér færi síðustu mínúturnar og voru FH-ingar í raun líklegri til að bæta við marki en Fram og jafna og því fögnuðu FH-ingar stigunum þremur í leikslok.

Dómari: Þóroddur Hjaltalín (6)

Skot (á mark): 5-14 (3-6)

Varið: Ögmundur 4 – Gunnleifur 1

Hornspyrnur: 2-9

Aukaspyrnur fengnar: 13-6

Rangstöður: 0-1