Páll Viðar: Súrsætt hugarfar

Páll Viðar Gíslason var ánægður með baráttu sinna manna gegn FH í kvöld en Þórsarar gerðu 2-2 jafntefli við Hafnfirðinga. Manni færri komst Þór yfir en FH jafnaði í lokin.

"Úr því sem komið var er ég sáttur með að fá eitt stig úr leiknum. Vinnuframlagið hjá mínum mönnum var alveg frábært. Hugarfarið mitt er súrsætt eftir leikinn,” sagði Páll.

“Baráttan var flott en auðvitað vildum við öll stigin. Rauða spjaldið þjappaði okkur saman en ég hefði samt frekar viljað vera 11 á móti 11. En þeir sem voru inn á unnu þetta vel upp, það vill oft verða þannig við rauð spjöld,” sagði Páll.

Slök dekkning varð til þess að FH skoraði tvö mörk en Páll bendir á að í mörkum eru alltaf einhver mistök gerð. “Ég hef svosem ekki skoðað þetta en þeir eru með flotta krossa og svona góður skallaður eins og Hannes á ekki að vera dauðafrír í teignum, það er alveg ljóst.”

“En ég er ánægður með leikinn, sérstaklega seinni hálfleik og það eina sem ég er ósáttur við er að hafa ekki tekið þrjú stig,” sagði þjálfarinn.