Jón Guðni spilar með Fram á morgun

"Ég var með nokkur tilboð líka frá Norðurlöndunum en ekkert sem var að heilla mig. Að fara hingað er fínt næsta skref fyrir mig," sagði Jón Guðni Fjóluson sem í dag skrifaði undir samning við belgíska úrvalsdeildarfélagið Germinal Beerschot.

Hann samdi við félagið til þriggja ára með möguleika á eins árs framlengingu.

"Liðinu gekk ekkert sérstaklega vel í fyrra og það verða einhverjar hreinsanir í sumar. Þetta er fínt félag. Hér mæta allt frá 8.000 upp í 12.000 manns á leik," sagði Jón Guðni sem mun spila með Fram gegn Breiðablik á morgun enda tekur samningurinn við belgíska félagið ekki gildi fyrr en 1. júlí.

"Ég flýg heim í kvöld, spila á morgun og fer svo aftur út með U-21 árs landsliðinu á miðvikudag. Það er nóg að gera."

Nánar verður rætt við Jón Guðna í Fréttablaðinu á morgun.