Páll: Auðvitað vorum við heppnir

Páll Viðar Gíslason, þjálfari Þórs, viðurkenndi að liðið sitt hefði verið heppið að vinna ÍBV í kvöld. Þórsarar lönduðu karaktersigri, 2-1.

"Það lá mikið á okkur, sérstaklega í seinni hálfleiknum, og auðvitað vorum við heppnir að þeir skoruðu ekki. Ég er ánægður með varnarvinnuna hjá öllu liðinu og Srjdan átti góðan dag," sagði Páll við Vísi eftir leik.

Þórsarar hafa verið gagnrýndir fyrir skipulagsleysi en Páll stendur við allt sitt. "Við höfum spilað mikið á útivelli og ég ver taktíkina okkar þar hvar og hvenær sem er. Það er ánæggjulegt að ná að vinna heimaleikinn fyrir framan okkar áhorfendur, og að standa undir þessu heimavallarvígi sem við viljum að völlurinn okkar sé. Hann hefur reynst vel síðan við komum hingað og við erum hvergi bangnir að taka á móti hvaða liði sem er hérna," sagði Páll.

Þrír leikmenn voru settir í agabann og segir Páll að það gæti hafa haft áhrif á liðið. "En það skiptir ekki máli núna, þetta er gleymt og grafið og þeir koma til greina í næsta leik eins og allir Þórsarar."

Þórsarar eru með sex stig eftir sex leiki og eru þeir fyrir ofan Fram í næst neðsta sæti deildarinnar. Þó er stutt á milli liðanna og með sigri á FH í leik sem liðið á til góða getur það komið sér í sjötta sætið.

Sá leikur er á Þórsvellinum 13. maí.