Umfjöllun: Ingimundur Níels hetja Fylkis

Fylkir vann í kvöld 2-1 sigur á Keflavík en það var Ingimundur Níels Óskarsson sem skoraði bæði mörk sinna manna í leiknum og sigurmarkið í lok venjulegs leiktíma.

Jóhann Birnir Guðmundsson skoraði kom Keflavík yfir snemma leiks en Ingimundur Níels Guðmundsson jafnaði metin fyrir heimamenn. Þannig var staðan í hálfleik og lengi vel leit út fyrir að þetta yrði lokastaðan í leiknum.

En Fylkismenn voru líklegri til að skora í seinni hálfleik og náðu loksins sigurmarkinu á ellefu stundu. Ingimundur Níels var þar aftur að verki og tryggði hann sínum mönnum góð þrjú stig á heimavelli.

Leikurinn byrjaði með látum. Jóhann Birnir gerði mjög vel þegar hann fékk boltann rétt utan vítateigs og skoraði með hnitmiðuðu skoti strax á þriðju mínútu leiksins. Fylkisvörnin var ekki mætt til leiks, eins og stundum er sagt.

Keflvíkingar héldu áfram að pressa heimamenn eftir þetta en Fylkismenn fóru þó hægt og rólega að ná betri tökum á sínu spili og skapa sér nokkur ágæt færi.

Andrés Már átti til að mynda skot í stöng á nítjándu mínútu og stuttu síðar var Ingimundur Níels kominn í gegn eftir stungusendingu Andrésar en Ómar í marki Keflavíkur varði vel frá honum.

Ingimundur Níels gerði þó engin mistök þegar hann jafnaði metin á 23. mínútu. Hann fékk sendingu inn í teig, tók boltann snyrtilega niður og setti hann með glæsilegri hliðarklippingu, ef svo má að orði komast.

Þegar um hálftími var liðinn af leiknum komst svo Albert Brynjar í gott skallafæri eftir fyrirgjöf Baldurs Bett en sá fyrrnefndi var dæmdur rangstæður.

Keflavík átti þó sín hálffæri í fyrri hálfleiknum en Fjalar var vandanum vaxinn í markinu.

Greinilegt var að hvorugt lið vildi gefa færi á sér í seinni hálfleik því afskaplega lítið markvert gerðist lengi vel. Fylkismenn voru þó gráðugri aðilinn, sem fyrr segir, og uppskáru fyrir það síðbúið sigurmark.

Fylkir – Keflavík 2-1Dómari: Erlendur Eiríksson (8)

Skot (á mark): 12–11 (7-5)

Varin skot: Fjalar 4 – Ómar 4

Hornspyrnur: 8–2

Aukaspyrnur fengnar: 10–13

Rangstöður: 5–2

Fylkir (4-3-3):

Fjalar Þorgeirsson 6

Andri Þór Jónsson 6

Valur Fannar Gíslason 7

Þórir Hannesson 6

Tómas Þorsteinsson 6

Ásgeir Börkur Ásgeirsson 6

Baldur Bett 5

(68. Rúrik Andri Þorfinsson 5)

Gylfi Einarsson 6

(85. Andri Már Hermannsson -)

Andrés Már Jóhannesson 7

Ingimundur Níels Óskarsson 8 – maður leiksins

Albert Brynjar Ingason 6

(74. Kjartan Ágúst Breiðdal -)

Keflavík (4-3-3):

Ómar Jóhannsson 6

Goran Jovanovski 5

Adam Larsson 6

Haraldur Freyr Guðmundsson 6

Viktor Smári Hafsteinsson 6

Andri Steinn Birgisson 6

Einar Orri Einarsson 5

Jóhann Birnir Guðmundsson 6

(83. Bojan Stefán Ljubicic -)

Hilmar Geir Eiðsson 4

Magnús Sverrir Þorsteinsson 4

(63. Magnús Þórir Matthíasson 5)

Guðmundur Steinarsson 6