Ólafur: Takk fyrir stigin

Ólafur Þórðarson var vitaskuld kampakátur með sigur sinna manna gegn Keflavík í Pepsi-deild karla í kvöld.

Fylkismenn lentu undir í kvöld en sneru taflinu sér í vil og unnu 2-1 sigur. Yfirleitt hefur það verið á hinn veginn en í þetta sinn stóðu Fylkismenn uppi sem sigurvegarar.

„Takk fyrir stigin. Loksins dettur eitthvað með okkur. Við höfum meira vetrið í því að gefa svona leiki frá okkur á síðustu mínútunum en það snerist okkur í vil í dag,“ sagði Ólafur.

„Við gáfum þeim 1-0 í forskot eftir að hafa mætt hálf sofandi til leiks. En eftir fyrstu fimmtán mínúturnar fannst mér við taka leikinn yfir og stýra honum til loka fyrri hálfleiksins. Það var svo meira um barning í þeim síðari,“ bætti Ólafur við.

Ólafur gerði nokkrar breytingar á sínu liði í kvöld og stillti til að mynda Andrés Má Jóhannessyni á hægri kantinum. „Mér fannst það ganga bara ágætlega. Það er mikið álag búið að vera á leikmönnum og því þarf maður að púsla því til. Jóhann Þórhalls er meiddur núna og Baldur Bett að koma til baka eftir meiðsli. En við reynum að stilla upp okkar sterkasta liði hverju sinni.“

„Þetta voru mjög mikilvæg stig. Við höldum okkur með í þessum pakka í efri hluta deildarinnar og að sama skapi er það mikilvægt að detta ekki í gryfjuna í neðri hlutanum.“