Hannes: Gaman að kljást við Tryggva

Hannes Þorsteinn Sigurðsson átti mjög góðan leik í fremstu víglínu hjá FH í dag. Skoraði og virðist vera að styrkjast með hverjum leik.

"Við vorum kannski ekki alveg vaknaðir á fyrstu mínútu en við náum marki snemma og tókum vel á þessu og sýndum báráttu og gerðum það sem þurfti að gera," sagði Hannes sem hafði gaman af því að glíma við Tryggva Bjarnason.

„Það var gaman. Þeir gerast ekki mikið sterkari og það er gaman að kljást við hann. Ég held að við höfum skemmt okkur vel.

„Þegar þriðja markið kom þá þurftum við ekkert að keyra jafn mikið á þá og áður. En við áttum nokkur færi og hefðum vel getað bætt við. En þriðja markið virðist drepa þá og þeir ranka í raun ekkert við sér fyrr en undir lokinn. Þá reyna þeir að gera eitthvað. Mér fannst þetta vera í okkar höndum allan leikinn," sagði Hannes.