Bjarni: Vítaspyrnudómurinn kálaði leiknum

„Upphaf leiksins var mjög gott hjá okkur og við sleppum einir í gegn tvisvar sinnum og ég geri kröfu um að nýta í það minnsta annað færið," sagði Bjarni Jóhannsson, þjálfari Stjörnunnar, eftir tapið gegn FH í kvöld.

"Ég hefði viljað sjá okkur skora fyrsta markið því þá hefðu þeir þurft að koma með varnalínuna sína framar og þá hefðum við fengið fleiri færi.

"En svo kemur fyrsta markið þeirra og þá er á brattann að sækja eins og kannski er eðlilegt hér í Krikanum. En við reyndum og reyndum og við vorum mjög oft í hálffærum. Það var dugnaður í liðinu en síðan kálar þessi vítaspyrnudómur leiknum fyrir okkur.

"Þetta var mjög vafasamt víti. Að dæma vafasamt víti af aðstoðardómara og brotið er inn í miðjum teig.

Þeir eru báðir að horfa á boltann og skella saman og ég held að hann hafi verið að fara flagga rangstöðu. En þetta var grimm ákvörðun," sagði Bjarni sem vildi sjálfur fá víti.

„Tryggvi er togaður niður og eins finnst mér vafasamt þegar Gulli kýlir Danna niður. Að mínu mati hefði Danni getað stýrt þessum bolta í netið hefði Gulli ekki komið svona agressívur út. Svo í lokin þegar aukaspyrna er dæmd nánast á línunni.

Bjarni sá ekki þegar Halldór Orri veifaði löngu töng framan í menn í stúkunni.

„Ég sá það ekki. Ég tók á móti honum og varð ekki var við þetta. En það má vel vera. Það má gera frétt úr gróu sögunum."