Breiðablik gæti þurft að spila í varabúningi á heimavelli

Íslandsmeistarar Breiðabliks taka á móti 2. deildarliði Völsungs í Valitor-bikarnum í kvöld. Sú einkennilega staða gæti komið upp að Blikar yrðu að leika í varabúningi sínum á heimavelli.

Þegar dregið var í 32-liða úrslitin fóru Húsvíkingar beint í það að panta sér varabúning enda leika þeir í grænu rétt eins og Breiðablik. Er það í fyrsta skipti í nokkur ár sem Völsungar hafa þurft að eiga varabúning.

Samkvæmt heimildum Vísis stendur það tæpt að búningarnir verði tilbúnir fyrir kvöldið og fari allt á versta veg gætu Blikarnir þurft að fara í varabúninginn sinn.

Annars er mikill hugur í Húsvíkingum fyrir kvöldið og þeir ætla að hrista sig saman á Spot í Kópavogi fyrir leikinn og er mæting þangað klukkan 17.00