Heimir: Við vorum að skapa okkur fullt af dauðafærum

Heimir Hallgrímsson, þjálfari ÍBV, var ánægður með leik sinna manna eftir sannfærandi 2-0 sigur á Víkingum í Eyjum í dag. Eyjamenn voru mikið meira með boltann og Heimir talaði um að þetta hafi verið nánast fullkominn leikur hjá sínum mönnum.

„Það sem við erum að bæta frá því síðast er að við erum að skapa okkur fullt af færum, dauðafærum. Við náðum reyndar ekki að klára þau öll en við fengum fullt af færum. Við réðum leiknum allan tímann og Víkingarnir fengu aldrei neinn tíma," sagði Heimir.

Eyjamenn settu hápressu á Víkingsliðið og voru yfirleitt fljótir að vinna boltann af þeim. Með því héldu þeir þeim svolítið út úr leiknum.

„Ef þeir unnu boltann þá unnum við hann fljótt aftur og það var ég mjög ánægður með. Ég var ánægður með þá pressu sem við settum á þá," sagði Heimir.

Það hefur verið skrifað mikið um að Eyjamenn séu að leita sér af sóknarmanni og að það vanti nauðsynlega annan framherja í þetta lið. Það var ekki að sjá á liðinu í dag.

„Það er kannski kosturinn við að vera með lítinn hóp yfir vetrartímann að menn eru að spila margar stöður á völlum og þessir strákar hafa þurft að spila ýmsar stöður á vellinum," sagði Heimi.

„Ég er heilt yfir mjög sáttur við leikinn. Þetta var mikill liðsheildarsigur og það var enginn sem stóð áberandi mikið uppúr í leiknum. Það voru í raun allir góðir og enginn lélegur," sagði Heimir.

Tryggvi Guðmundsson og Ian Jeffs voru að ná einstaklega vel saman í leiknum en þeir voru að spila vel á milli sín og skapa sér hættuleg færi.

„Hæfileikarnir hjá Ian Jeffs nýttust mjög vel í þessum leik, hann er mjög klókur að finna svæði til að hlaupa í, hlaupalínurnar góðar og þetta var ekta leikur fyrir hann.” sagði Heimir.