Andri: Algjört tempóleysi, hugmyndaleysi og kraftleysi

Andri Marteinsson, þjálfari Víkinga, var að vonum ósáttur eftir 0-2 tap á móti Eyjamönnum á Hásteinsvellinum í dag. Eyjamenn stjórnuðu leiknum frá fyrstu mínútu og Víkingarnir náðu aldrei að komast inn í leikinn.

„Mér fannst þetta aldrei verða neinn leikur. Við veittum þeim aldrei þá mótspyrnu sem við ætluðum að gera," sagði Andri en Víkingsliðið hefur aðeins skorað eitt mark í síðustu fimm deildarleikjum sínum.

Víkingar virtust vera á eftir í öllum aðgerðum í dag, voru einfaldlega á hælunum og náðu ekki að skapa sér nein hættuleg færi.

„Menn eru búnir að vera að tala um það hingað til að vellirnir séu ekki nógu góðir til að spila á og annað en málið er bara að ef að þú ert ekki að hreyfa þig með og án bolta þá skiptir annað ekki máli. Hreyfanleiki með og án bolta er lykilatriðið í þessu. Það fór bara eins og fór. Við vorum ekki nógu hreyfanlegir og þeir voru fljótir að vinna af okkur boltann. Það var algjört tempóleysi, hugmyndaleysi og kraftleysi og þá er þetta útkoman," sagði Andri ókátur.

Helgi Sigurðsson og Björgólfur Takefusa voru í framlínunni hjá Víkingum en það var lítið sem ekkert að frétta af sóknarleik þeirra eða þá af leik þeirra í heild.

„Sóknarparið var ekki að virka frekar en aðrir í dag, við erum búnir að vera að spila á sama kerfi en þetta var í raun allt liðið sem náði sér ekki á strik í þessum leik, ekkert sérstaklega framlínan frekar en aðrir.” Sagði Andri Marteinsson.