Grétar Sigfinnur: Alltaf gaman að skora

Grétar Sigfinnur Sigurðarson varnarjaxl KR-inga átti afbragðsleik í vörn sinna manna í kvöld og kórónaði hann góðan leik sinn með því að skora sigurmarkið ellefu mínútum fyrir leikslok.

„Þetta var frábært. Mér fannst við vera með tökin á leiknum allan tímann. Þeir fá þetta umdeilda víti. Mummi er með hendurnar meðfram síðum og hann sparkar bara upp í hendurnar á honum. Erfitt finnst mér að dæma víti á þetta. Fyrir utan vítið fannst mér þeir ekki ná að þjarma neitt að okkur þótt það sé auðvitað alltaf erfitt að spila gegn Fram," sagði Grétar.

„Þeir eru góðir og eiga ekkert heima þarna á botninum. Þetta var barátta út í gegn og við náðum að merja þetta sem betur fer. Mér finnst við virka vel saman núna og vonandi heldur þessi meðbyr bara áfram. Næst er það FH og við höfum átt í erfiðleikum með þá en við erum sannfærðir um að við getum sigrast á þeim eins og hvaða  andstæðingi sem er," sagði Grétar.

Aðspurður um markheppni sína gegn Fram hafði Grétar þetta að segja. „Já hef haft lag á því að skora gegn Fram og það er alltaf gaman að skora og þá sérstaklega þegar um sigurmark er að ræða," sagði Grétar að lokum.