Þorvaldur: Menn eru svekktir og sárir

Þorvaldur Örlygsson þjálfari Framara var niðurlútur í leikslok eftir 1-2 tap gegn KR-ingum í kvöld. Framara sitja einir á botninum með eitt stig og ljóst er að Þorvaldur þarf að blása lífi í lið Framara ef ekki á illa að fara.

„Við spiluðum ágætlega í dag en fáum lítið út úr því. Við þurfum að safna stigum og erum því miður ekki að ná því eins og er. Það má því segja að við séum í erfiðleikum," sagði Þorvaldur.

„Við náum ekki að nýta þá leikkafla þegar við erum með yfirhöndina og það kemur í bakið á okkur. Þessi sigur gat dottið hvoru megin sem er og þetta datt þetta ekki okkar megin," sagði Þorvaldur.

„Drengirnir lögðu sig fram og það er hugur í strákunum þó það pirri menn auðvitað að lenda í taphrinu. Menn eru svekktir og sárir en það þýðir lítið að setjast niður og vorkenna sér. Við verðum bara að halda áfram að reyna að ná í stig," sagði Þorvaldur að lokum.