Gummi Ben: Þetta var þolinmæðisvinna

Guðmundur Benediktsson aðstoðarþjálfari Breiðabliks var hress að leik loknum. „Þetta var nauðsynlegt eftir tvö töp í byrjun að ná í þrjá punkta. Þetta var smá strögl en menn sýndu þolinmæði og voru ekkert að flýta sér um of. "

Bæði mörk Blikanna komu eftir föst leikatriði sem Guðmundur sagði kærkomið.

„Við höfum verið að fá á okkur mörk úr föstum leikatriðum og það er fínt að geta sýnt að við getum skorað eftir föst leikatriði. Við vorum í mjög góðum stöðum aftur og aftur í leiknum, vorum að koma okkur á þá staði sem við vildum komast en það vantaði herslumuninn uppá. Það var þolinmæðisvinna að komast í gegnum þetta en menn gerðu það vel."

Tómas Óli Garðarsson fékk tækifærið á hægri kantinum hjá Blikum í kvöld og var meðal bestu manna vallarins.

„Mér fannst frammistaða mín þokkaleg, hefði getað verið aðeins betri. En ég er sáttur með tækifærið og geri mitt besta."

Hann sagði Blikana hafa rætt það að fá ekki á sig óþarfa rauð spjöld.

„Við erum búnir að tala um að vera ekki með neina vitleysu, vera jákvæðir og sleppa því að öskra á dómarann. Loksins vorum við einum manni fleiri en ekki færri og við nýttum okkur það."