Þrír lykilmenn Valsliðsins meiddir

Valsmenn hafa orðið fyrir mikilli blóðtöku en þrír af lykilmönnum liðsins eru meiddir. Færeyski bakvörðurinn Pól Jóhannus Justinussen nefbrotnaði í Fylkisleiknum í gær og verður frá keppni í 2-3 vikur samkvæmt heimildum íþróttadeildar Stöðvar 2.

Þá voru tveir menn meiddir fyrir og gátu ekki leikið gegn Fylki, Arnar Sveinn Geirsson sem óttast er að verði frá í fjórar til sex vikur og Haukur Páll Sigurðsson sem fer í myndatöku á morgun.

Enn er óljóst hversu alvarleg meiðsli hans eru en það stefnir í að Valsmenn verði án þessarra lykilmanna í næstu þremur deildarleikjum gegn Fram, Breiðablik og Keflavík sem og bikarleiknum gegn Víkingi Ólafsvík.