Ingólfur biður KR-inga afsökunar

Fátt hefur verið um meira rætt síðustu daga en knattspyrnumanninn unga, Ingólf Sigurðsson. Hann gerði allt vitlaust er hann sagði ungum leikmönnum að halda sig frá KR. Í kjölfarið lýsti hann því yfir að hann ætlaði sér að gera allt sem hann gæti til þess að losna frá KR.

KR kvartaði til KSÍ í kjölfarið vegna Valsmanna fyrir að tala ólöglega við Ingólf. Þeir drógu þá kvörtun til baka er Ingólfur var seldur til Vals rétt fyrir lok félagaskiptagluggans á sunnudag.

Ingólfur hefur nú viðurkennt að hafa komið illa fram og sendi í gær frá sér yfirlýsingu þar sem hann biður alla KR-inga afsökunar á hegðun sinni.

Yfirlýsingu Ingólfs má sjá hér að neðan.

Í síðustu viku gerði ég mig sekan um það að gera lítið úr KR og því starfi sem þar er unnið. Ég harma gerðir mínar og geri mér fullkomlega grein fyrir að hafa stigið feilspor. Mér þykir einnig leitt hvernig málið vatt upp á sig.

Ég tel mig nú þegar hafa lært mikið af mistökum mínum. Helst má þar nefna að tala minna og að einbeita sér að því að æfa og spila vel.

Ég bið hér með þjálfara, stjórn, leikmenn og ekki síst stuðningsmenn KR um land allt afsökunar og óska þeim öllum innilegrar velgengni.

Ég mun nú huga að framtíðinni og því er þessu máli lokið af minni hálfu.

Reykjavík, 16. maí 2011.

Ingólfur Sigurðsson