Valur greiddi eina milljón fyrir Ingólf

Friðjón Fríðjónsson, formaður knattspyrnudeildar Vals, braut ákveðið blað í íslenskri knattspyrnusögu í dag þegar hann greindi frá kaupverði Ingólfs Sigurðssonar frá KR í Val. Venjulega eru íslensk félög algerlega ófáanleg til þess að staðfesta kaupverð á leikmönnum en Friðjón vildi opinbera töluna til þess að drepa slúðursögur.

"Við greiddum eina milljón króna fyrir drenginn," sagði Friðjón við Vísi en Ingólfur er aðeins 18 ára gamall og samningur hans við KR átti að renna út í lok sumars.

"Mér finnst þetta svolítið há tala fyrir 18 ára leikmann en þar sem hann var til í að taka á sig launalækkun frá því tilboði sem við lögðum fyrir hann í upphafi árs var þetta gerlegt."

Nánar verður fjallað um þetta mál í Fréttablaðinu á morgun.