Leik Breiðabliks og KR verður líklega frestað

Það verður líklega ekkert af því að Íslandsmótið í knattspyrnu hefjist á tilsettum tíma í kvöld. KSÍ mun funda um málið fljótlega og taka ákvörðun í kjölfarið.

Opnunarleikur Pepsi-deildarinnar á að vera leikur Íslandsmeistara Breiðabliks og KR.

Kópavogsvöllur er langt frá því að vera í leikhæfu ástandi eins og blaðamaður Vísis komst að raun um er hann renndi þar við klukkan ellefu í morgun.

Völlurinn er á kafi í þykkum og blautum snjó. Undir snjónum er grasið rennandi blautt. Ef völlurinn yrði mokaður yrði leikurinn líklega ekkert annað en leðjuslagur af bestu gerð.

Möguleikar KSÍ eru því annað hvort að færa leikinn inn í Kórinn eða fresta honum.

Ólíklegt verður að teljast að leikurinn verði færður inn í Kórinn þar sem hann myndi seint taka alla þá áhorfendur sem búist er við á völlinn.

Ekki er óvarlegt að áætla að rúmlega 2.000 manns hafi í hyggju að fara á þennan leik. Slíkan fjölda ræður Kórinn ekki við og því yrði Breiðablik hreinlega af tekjum með því að færa leikinn inn í hús.

Þá er aðeins frestunarmöguleikinn eftir og verður að teljast ansi líklegt að KSÍ-menn verði að játa sig sigraðan í þessum slag við veðurguðina.