Vallarstjóri Kópavogsvallar: Kom ekki til greina að moka völlinn

Ómar Stefánsson, vallarstjóri Kópavogsvallar, segir lítið annað hafa verið í stöðunni en að fresta leik Breiðabliks og KR í kvöld. Einhverjar óánægjuraddir hafa heyrst þar sem ekki sé búið að moka völlinn og síðan vona það besta.

Ómar segir að sá möguleiki hafi ekki verið í stöðunni.

"Þegar farið er að moka völl sem er þiðinn undir þá skilja hver mistök eftir sig sár eins og eftir tæklingu. Ef það eiga að mæta 50-100 sjálfboðaliðar með skóflur þá endar það með því að völlurinn skemmist of mikið. Á það var ekki hættandi," sagði Ómar við Vísi.

"Það er erfitt að moka og svo verður líka mikil þjöppun enda snjórinn þykkur og þungur."

Þó svo lítið hafi verið að marka veðurspár þá trúa menn því að veðrið fari að lagast.

"Spáin er góð og völlurinn ætti að vera orðinn þurr og góður á þriðjudag."