Ekki hægt að komast frá Eyjum eftir leik á morgun

Þeir stuðningsmenn Fram sem hafa hug á því að fara til Vestmannaeyja á morgun og fylgjast með sínu liði spila gegn ÍBV í Pepsi-deildinni verða að gera sér að góðu að gista í Eyjum ef þeir fara á leikinn.

Hvorki er siglt né flogið frá Vestmannaeyjum eftir að leik lýkur. Áhugasamir þurfa því að leggja út fyrir gistingu og jafnvel fá frí í vinnu til þess að sjá leikinn.

"Þetta er auðvitað bagalegt. Við erum háðir þessum samgöngum og á meðan Landeyjahöfn er ekki í lagi verðum við að bíta í það súra epli að þetta er svona," sagði Þórir Hákonarson, framkvæmdastjóri KSÍ.