Þórsarar keyrðu heim: Vont en það venst

Pepsi-deildar lið Þórs var ekki komið heim fyrr en 4 í nótt eftir leik liðsins gegn Víkingi. Liðið varð að keyra heim með rútu og þetta var ekki síðasta rútuferð liðsins í sumar.

"Þetta er vont en það venst. Við áttum ekki kost á því að fljúga því síðasta vélin er farin norður áður en leik lýkur," sagði Páll Viðar Gíslason, þjálfari Þórs, en Þórsarar flugu þó suður í leikinn.

"Þetta sparar einhvern pening enda kostar um 300 þúsund krónur að fljúga báðar leiðir. Við erum líka með kvennalið en þær eru kannski duglegri að keyra báðar leiðir."

Þórsarar taka með sér suður góðan mann sem keyrir liðið heim og sinnir starfi einnig starfi liðsstjóra.

"Það er Gunnþór Kristjánsson sem keyrir okkur. Hann er líka fínn liðsstjóri og vantar aldrei vatn. Það er ómetanlegt að eiga svona menn," sagði Páll.

Þór mun fá að spila einhverja um helgar fyrr svo þeir geti flogið heim.

"Svo eigum við að spila klukkan 20.00 á móti KR. Ég veit ekki hvernig það verður."