Björn Jónsson æfir með FH þessa dagana

Björn Jónsson, 21 árs gamall Skagamaður og fyrrum leikmaður Heerenveen í Hollandi, æfir þessa dagana með FH-ingum en þetta kemur fram á heimasíðu Stuðningsmanna FH-liðsins, fhingar.net.

„Að sögn Heimis Guðjónssonar þjálfara FH þá æfir hann með FH í vikutíma til að byrja með," segir í fréttinni en Björn er að koma til baka eftir þráðlát meiðsli.

Björn er sóknarmaður og hefur verið á mála hjá Heerenveen í Hollandi síðan 2005 en hann fór út aðeins fimmtán ára gamall og spilaði aldrei með meistaraflokki ÍA.

Björn var að koma úr kviðslitsaðgerð og ætlar sér að komast að hjá liði í Pepsi-deildinni til þess að spila sig í gott leikform en stefnan er síðan sett á að komast aftur út í atvinnumennsku.